شغل الأسنان مختلف. المريض مش بيجي مرة واحدة ويمشي — بيجي على جلسات، والعلاج بيتقسّط، وفيه خامات بتتستهلك، وتركيبات بتروح لمعمل بره وترجع. أي برنامج مش فاهم ده هيبقى مجرد دفتر إلكتروني.
خريطة الأسنان — مش رفاهية
الدكتور بيفكر بالسنّة مش بالتاريخ. لازم تفتح المريض وتشوف خريطة فم كاملة بترقيم FDI، كل سنّة ملوّنة بآخر شغل اتعمل فيها، وبضغطة عليها تشوف تاريخها.
الفرق عملي: بدل ما تقرا 6 زيارات عشان تعرف الضرس ده اتعمله إيه، بتبص على الخريطة وتعرف في تانيتين.
العلاج حالة مش زيارة
الحشو مش موعد — هو حالة ليها سعر متفق عليه، وجلسات، ومدفوعات. لازم البرنامج يفهم ده:
- السعر المتفق عليه مع المريض
- الجلسات اللي اتعملت
- المدفوع والمتبقي
- الأسنان المشمولة
التقسيط ومتابعته
معظم علاجات الأسنان بتتقسّط. والبرنامج لازم:
- يسجل جدول أقساط مرن (مش مربوط بعدد الجلسات)
- يخصم أي دفعة من الأقساط تلقائيًا
- يطلع للاستقبال قائمة يومية بالمتأخرين وأرقامهم
- يبعت تذكير للمريض لوحده
أكتر فلوس بتضيع في عيادات الأسنان مش من الخصومات — من أقساط محدش تابعها.
المخزون والخامات
لو مش عارف الحشو الضوئي بيخلص إمتى، هتكتشف إنه خلص وإنت بتشتغل. الأهم من ده: تكلفة الخامات الحقيقية لكل حالة. البرنامج الكويس بيخليك تسجل خامات كل خدمة مرة واحدة، وبعدها بتتخصم لوحدها مع كل جلسة وتتحسب على الحالة.
معامل التركيبات
الطربوش بيروح معمل وبيرجع. لازم تعرف: كل تركيبة عند أنهي معمل، متأخرة ولا جاهزة، وكشف حساب لكل معمل. من غير ده بتفضل تتصل بالمعامل تسأل.
نسب الدكاترة (لو مركز)
لو عندك دكاترة بنسبة، دي أكتر حاجة بتوقع الشراكات. النظام لازم يحسب النسبة بعد خصم الخامات والمعمل، ويدي كل دكتور تقرير بشغله هو بس مفصّل معاملة بمعاملة.
تقفيل اليوم
آخر اليوم: النظام يقولك المفروض في الدرج كام، تكتب الموجود فعلًا، والفرق يبان. وبعد التقفيل اليوم يتقفل ومحدش يعدّل عليه.
خلاصة
لو البرنامج اللي بتشوفه فيه "مواعيد + ملفات + فواتير" وبس — ده برنامج عيادة عامة. عيادة الأسنان محتاجة الست حاجات اللي فوق، وأي حاجة ناقصة منهم هتكتبها في ورقة جنب الشاشة.